Со брзина на филмска лента се одвиваа настаните во последниве четири недели. Посетив еден меѓународен семинар во Италија (со Сенсеи Нобутоши Отаке во Милано), организирав два меѓународни во нашето Хомбу Доџо (Сенсеи Антонино Черта и Сенсеи Ерик Лоув), како и еден за Шиноби Таисо на кој јас предавав. Гледано од страна, сигурен сум дека никој не може ниту да претпостави колку труд е потребно за да се изведе сето ова. Да не зборуваме воопшто за тоа колку финансиски средства треба да се издвојат од сопствениот џеп. Велам од сопствениот, од причина што сите споменати настани, освен тој на кој јас предавав, ги „покрив“ лично, а со цел да им озвозможам на учениците кои имаат желба да вежбаат со моите Учители.

И сите тие непроспиени ноќи, сите тие дополнителни обврски за да успеам во тоа што сум го зацртал се занемаруваат кога ќе се случаат некои настани што ми даваат волја да продолжам понатаму. Овој пат за тие мали работи кои даваат голема сила да се истрае на Патот.

1. Дента кога Сенсеи Черта пристигна во Македонија, ја чекавме Косара пред нејзиното школо да се врати од четиридневната екскурзија во Струга. Половина час пред почетокот на часот за боречки вештини во нашето доџо, таа ми заѕвони на телефон и загрижено ми прозборе: „Тато, автобусот заглави на пластичарската улица поради некои демонстрации и се плашам дека ќе задоцнам на тренинг. Чекај ме спремен со ранецот и со кимоното, не сакам да пропуштам ниту еден час“.
Се замислив малку и се запрашав, од каде детево мое има толку голема волја за да замине право на тренинг, после толкав изминат пат. Кога автобусот пристигна, се гушнавме кратко и со голема брзина се упативме кон доџо-то. Стигнавме точно на време пред самата „молитва“.

2. Следниот ден го однесов Сенсеи Черта во Лабораторијата за Источни Кулутури (УКИМ). Со тоа ми се оствари една голема желба – мојот Учител да присуствува на еден мој час во „сината соба“ на Природно-математичкиот Факултет. Само што влезе во просторијата му пријде професорката д-р Весна Гершан (Институт за Физика), инаку редовен „вежбач“ во доџо-то и му се обрати: „Да го карате вашиот ученик. Ги скина лигаментите на рамото и само еден час паузираше. Јас знам дека за таква повреда треба најмалку шест месеци пауза и секако хируршки зафат. Ама истовремено сум среќна за неговото опоравување и да ви кажам дека бев сведок на целиот тој процес“.
Сенсеи Черта ја погледна со насмевка и и рече: „Ова момче е лудо. Го знам долго време, но што и да му кажам, се додека стои исправен на нозе – нема да прекине со тренинг, без разлика на повредата“.

3. Неколку дена откако Сенсеи Черта си замина во Милано, јас отидов на семинар во неговиот роден град. Во организација на шидоша Лујза Раини, се одржа четиридневно предавање со Сенсеи Нобутоши Отаке.
Третиот ден, по завршувањето на тренинзите гребаше да заминеме директно на вечера со учителот Нобутоши, па затоа влегов да се истуширам во салата каде што се одржуваше семинарот. Секако, облеката заедно со ранецот морав да ја оставам надвор од кабината за туширање. Ни беше кажано од страна на организаторот дека салата е заклучена за лицата од надвор. Кога излегов од кабината, забележав веднаш дека ранецот ми е откопчан. Посегнав веднаш по паричникот и забележав дека ми недостасуваат 250 евра, потребни за да ја платам хотелската соба при заминувањето.
Патувам на семинари уште од дете. И за дваесет и кусур години, ова беше прв пат да ме ограбат. И тоа во Милано, во Италија. И тоа од некој што вежба боречки вештини односно од учесник на семинарот.
На некои луѓе навистина не им е местото во доџо.
Само јас си знам какви маки „избуткав“ за да се вратам дома. Секако, никому не кажав за настанов. Ниту покажав некое разочарување или тага. Сега за прв пат соопштувам за тоа. Чувајте се…..

4. На семинарот со Сенсеи Ерик се пријавија само тројца членови на нашето доџо. За прв пат откога јас организирам семинари во нашата земја, имаме помалку од 8 учесници за некој меѓународен настан.
Сакам да им се заблагодарам на Марко, Ацо и на Таки за подршката што ми ја дадоа за време на последниот настан. Само толку имам да кажам за ова…..

Се гледаме вечер на тренинг.

Гамбатте Кудосаи!

Ајде да си бидеме искрени и отворени, како што впрочем си бевме сите овие години. Во петокот не бев на тренинг. Тоа го знаете.
А дали знаете зошто?
Како да Ви кажам, ама можеби сепак докторите биле во право:
http://bujinkan.koryu.mk/article/show/218

„Прогнозата на докторите е дека повредата ќе остави трајни последици, а со текот на годините може и да напредува до степен на инвалидитет“.

Кратка ретроспектива за минатата недела: во вторникот на Даито рју Аикиџуџутсу во Лабораторијата си правев укеми на Куби Наге. Во средата на Наге Ваза во доџо го повлеков Тошка малку посилно при фрлањето. Во четвртокот некако се борев со болката, во петокот попладне не можев да ја движам десната нога и морав да одам „по доктори“, а саботата и неделата ми беше најдолг викенд во животот.
Саботата неподвижен во кревет, во големи болки при мирување, а да не зборувам за движење. И постојано зачитан. „Анатомија на човечкото тело“, „Нервите и нервниот систем“ итн.

Недела наутро, и покрај сите тие маки, одлучен го поминав денот во вежби за истегнување и корегирање на мускулите и скелетот. Понеделникот, односно денес, веќе држев тренинг во Лабораторијата. Иако бев спор, несмасен, ужасен, сепак издржав.

Сакам да Ве замолам да ми дадете една седмица одмор. Само една седмица ми треба. Да се средам за семинарот за Даито рју во недела. А јас Ви ветувам дека за најбрз можен рок се враќам назад. Посилен од кога и да е.

А, да. Требаше и за тоа како „стојат работите“. На кратко и едноставно:
Местото каде што напукнала коската во 2011-та (карлицата), поради калцификација го развлекува мускулот на грбот, а тој, пак, го изместува нервот, при што десната нога се „одзема“. Оттаму и нивните прогнози за трајни последици и влошување на ситуацијата низ годините. Затоа и забраните за било каква физичка активност, бидејќи се помалку „напор“ ќе треба за да се истегне мускулот кој и онака е под голем притисок.

Мое решение: уште поголемо проучување на анатомијата, на движењето и уште посилен, но поселектиран тренинг за да се одложат сите можни инвалидитети на што подолг период. И тоа најмногу поради една работа. Ви должам бре Луѓе мои. Додека не Ве однесам до крајот на Патот не смеам да паднам. Мора да Ви го пренесам целото свое знаење, па потоа може и во дупка, немам страв ниту од тоа. Затоа велам, до последниот здив…во доџо!

Ќе поминам да Ве видам вечер на тренинг. И секако, не сакам вртење околу мене и „пажња“, туку сакам да слушнам убави работи за Вас и за Вашиот живот.
Јас тоа што имав да го кажам, тука го напишав. За да не Ви одземам повеќе од мислите и енергијата, кои треба да ги насочите во Вашето усовршување.

Гамбаре!

Три години по ред моите ќерки Косара и Ксенија се најредовни на часовите во детската група на Буџинкан Македонија (Нинџа Клинци).

Според правилата (статутот) на доџо-то, за возрасните кои немаат повеќе од три отсуства во текот на целата година, водачот на Организацијата им доделува Пофалница, која што се смета за многу важно признание за нивниот труд. Според истиот статут, на трите дечиња кои имаат најмалку отсуства во текот на годината, исто така им следува Пофалница.

Косара и Ксенија и во 2013 и во 2014 година имаа најмалку отсуства споредено со останатите дечиња. Но татко им (јас), не им додели Пофалници, иако сосема заслужено требаа да добијат.

Правилата кои важаат за моите ќерки се секогаш построги во однос на останатите дечиња.

Кога ме прашаа зошто за нив нема Пофалница и покрај тоа што отсуствувале само пет пати во текот на целата година, мојот одговор беше дека ќе добиева доколку немаа повеќе од три отсуства.

Знам дека не можат да ја разберат мојата строгост кон нив. Знам дека не им е јасно зошто правилата кои важат за сите, за нив се многу построги. Но еден ден ќе сфатат. Ќе разберат зошто нивниот татко секогаш бил со „крстот на чело“. И зошто, наместо да бидат привилегирани во однос на другите, за нив правилата секогаш биле построги.

Оваа година и двете се на добар пат да добијат Пофалници. Немаат направено повеќе од три отсуства во текот на целата 2015-та. И кога беа болни редовно ги посетуваа сите часови во детската група. И повеќе од тоа. Ги посетуваа и сите дополнителни саботни часови.

Само со труд и со крајна посветеност се добиваат привилегии во Буџинкан Македонија. И тие се подеднакви за сите кои се залагаат. Но секогаш, моите ќерки ќе треба да работат и да се докажуваат повеќе од останатите. Бидејќи доколку „крстот на челото“ падне долу, никогаш повеќе не може да се врати назад.

За време на семинарот во Романија, каде што бев поканет да предавам кенџутсу од страна да водачот на Шинган Доџо – Каталин Сореану, се случи да најдам малку слободно време и да се јавам преку вибер на семпаи Тодор Ангеловски, со цел да прашам дали е се во ред со тренинзите во „сината соба“.

Разговорот беше краток, а тој возвратно ме праша за условите во кои се наоѓам во моментот. Му одговорив дека Романците се однесуваат со неверојатна почит кон мене, дека ме сместиле во претседателскиот апартман во најдобриот хотел во градот и дека дури не се чувствувам баш најпријатно бидејќи не сум навикнат на таков лукзус.

Следниот ден прочитав на Форум дека Тоше и Марко накратко дискутирале за тоа, како корју-то секогаш ни возвраќа за трудот што сме го вложиле.

—Извадок од Форумот—

(Тоше: нa крaткo се слушнав сo Сенсеи, a пред тоа кoментирaвме сo Мaрче зa негoвиoт престoј вo Рoмaнијa. За тоа, какво е чувствoтo пoсле 20 и кусур гoдини пaтувaње, спиење пo дoџo-a, пaркети, лaдни тaтaми, хoстели и прчвaрници, дa те стaвaт вo претседaтелски aпaртмaн сo пoглед нa цел грaд и 7-8 метри гoлем прoзoрец.
Сенсеи бaш ми е милo штo тaкa те пречекaле, нaвистинa гoлемo брaвo зa дoмaќините и уште пoгoлемo брaвo зa тебе, зaтoa штo сo тoa штo гo прaвиш и не претстaвувaш, нaшетo дoџo, нaшaтa вештинa, нaшaтa земјa, несoмненo си зaслужил!
Марче: Баш е убаво да се види и слушне како е дочекан и угостен нашиот учител. Тошка, изгледа после 20 години корју-то почнува да враќа за жртвувањето.)

Тоа што сакам да го истакнам тука и всушност затоа и го пишувам овој блог, е дека не смееме да дозволиме егото да не совлада и да помислиме дека треба да вложуваме во нашата вештина со цел еден ден таа да ни возврати нешто што е материјално односно во вид на финансиска добивка. Ако се сеќавате на делот од книгата „Разговор со Учениците“, токму за ова не едно место напишав дека ниту еден од моите учители не вежбал за да има некаков финансиски поврат во иднина. Всушност, корју-то ни возвраќа на многу подобар начин. Ни дава здравје, енергија, знаење, мотивација, ни дава љубов.

Се друго, што после 20 години ќе си дојде, е само стапица која треба вешто да ја избегнеме со цел да не се најдеме во ситуација да станеме алчни и расипани.

Јас никогаш не вежбав за да отворам свое доџо преку кое ќе заработувам пари. Јас никогаш не вежбав за да предавам на семинари во Македонија или во странство. Јас не вежбав за да спијам во луксузни хотели и за да вечерам во префинети ресторани. Јас постојано вежбав ( и вежбам) со една цел – да ја усовршам вештината создадена од Учителите пред стотина години и правилно да ја пренесам на следните генерации.

Случајно или не, корју-то почна после 27 години лојалност – да ми возвраќа. Но како што напишав погоре, истовремено почна и да ми поставува нови тестови: дали ќе свртам од Патот, дали ќе помислам на можноста да почнам да станувам понезависен и да „предавам за пари“ или и понатаму да останам лојален на моите Учители и да предавам од љубов.

За среќа, јас никогаш не сум се двоумел ниту за миг во врска со Патот, а никогаш и не сум заборавил дека: „Подобро е да те обесат за верност, отколку да те наградат за предавство.“

Човекот што ја плука раката што го рани, обично ја лиже чизмата што го гази.

—————————————————————————————————————

Сакав, навистина сакав да ја известам јавноста дека отсега средношколците ќе имат можност да изберат студии на кои ќе можат да ја изучуваат културата и традицијата на Јапонија. Сакав младите да знаат дека постои факултет на кој во текот на школскиот ден можат да вежбаат и да се опуштат од долгите предавања. Сакав класичните јапонски вештини да се издигнат на академско ниво, бидејќи со тоа ќе го добијат местото кое што го заслужуваат. Сакав да ги направам моите учители среќни. Сакав преку вметнувањето на корју-то во студиите на ИЕА, да имам можност да вежбам уште некој саат повеќе дневно, бидејќи од вежбање сум зависен.

Но не сакав, ама навистина на сакав да свртам внимание на мене. Тоа воопшто не ми беше намерата. Овие денови примив многу честитки од многу драги луѓе кои навистина ми значат и многу сум им благодарен поради тоа. Но примив и покани од медиуми да ме снимат, интервјуират итн.
Па чекајте побогу! Само две недели поминаа. Уште не се знае дали ова ќе успее или не. Дајте ми време да се потрудам, да се испотам, да ги направам студентите на ИЕА среќни и задоволни. Тогаш ќе можеме да зборуваме за успех. Доколку поради овој проект во иднина привлечеме повеќе студенти на Институтот, доколку се појават заинтересирани младинци на вратата на ИЕА, тогаш ќе зборуваме за успех. Вака…отворив само мала врата која што треба да направи место за многу поголема. Ништо повеќе. Без желба за помпа и слава.

Но ова немаше никогаш да се случи да не беа моите ученици од Пат кон Сонцето / Буџинкан Македонија. Тие беа И ЌЕ ОСТАНАТ мојата мотивација. Секој мој успех, слободно можат да си го препишат и на себе. Тие учеа од мене, јас учев од нив.

Некои од студентите веќе почнаа да ме викаат Сенсеи. Следниот час ќе треба да им објаснам дека јас сум учител само на моите ученици од моето доџо. А тие си се студенти на ИЕА. Студенти на професорите кои работат таму. Можеби помалку и мои, но само СТУДЕНТИ. Не и мои ученици!

Моите ученици се во моето доџо. Во моето срце. Со нив ги делиме сите убави и неубави работи. Заеднички се радуваме на нашите успеси, но и заеднички тагуваме кога имаме причина за тоа.

Многу од нив со години верно го следат Патот (на Сонцето). Од ученици, прераснаа во другари. Како што веќе кажав, да не беа тие, за кого ќе беше целата оваа „борба“ и желба да се подобри работата во нашето доџо?

Благодарен сум Ви. И секогаш ќе Ви бидам. До крајот на мојот живот.

Сакам да се заблагодарам и на учениците кои ме заборавиле и кои ја вртат главата во страна кога ќе се разминеме. На оние кои се срамат да ме погледнат во очи. Малкумина се, но ги има и такви. И од нив научив многу. И тие помогнаа да го изградам мојот карактер. Разочараноста и болката нанесена од нив, ме направија уште полојален кон моите Учители. Сфатив дека Тие (Учителите) никогаш не смеат да почуствуваат болка и тага поради мене, бидејќи јас почуствував што значи кога некој кој толку си го сакал – те заборавил, те повредил.

И повторно – ВИ БЛАГОДАРАМ. На сите Вие кои минавте низ, или се уште сте дел од Пат кон Сонцето. Сите носите мал дел во себе и сите сте оставиле мала трага во Буџинкан Македонија.

Нинпо Иккан!

Другари…конечно…успеав! Ги издигнав јапонските класични боречки вештини на академско ниво во нашата земја. Тоа ми беше дамнешна желба и конечно успеав во тоа.

Го работев ова долго време. Многу непреспиени ноќи, честопати со намалена концентрација, нарушување на сопственото здравје, нарушување на односите со најблиските, изгубен поглед…многу жртвување. Но остварив уште една зацртана цел. Со само една мисла – јапонските класични боречки вештини да ги подобрат нашите сограѓани во секој поглед и да направат подобри личности, корисни за нашето општество.

Ова не е само мој успех. Ова е успех на целото наше доџо. Успех на Пат кон Сонцето. Нинпо Иккан!

Секогаш кога ќе им кажам на моите ученици дека треба да размислуваат поинаку од „обичните смртници“, најпрвин добивам „блед“ поглед кој јасно зборува дека не ме разбрале најдобро, што точно сакам да им кажам.

Исто така, честопати го користам изразот „погледнете и од другата страна“. За жал, малкумина го прават тоа, иако ме уверуваат дека целосно го разбрале неговото значење.

Сите знаете дека Таки најде работа како келнер, со цел да собере пари и да учествува на Летниот Корју Камп. Така, тој цели два месеци работи по цел ден за мизерна дневница од 200-300 денари, само за да може да учествува на овој навистина неверојатен настан што повеќето од нас го чекат во текот на целата година. Се откажа од многу работи, па дури и од редовните тренинзи, само за да може да ја постигне својата зацртана цел.
И што мислите Вие, мене толку многу ми беше тешко да го ослободам од таксата за камп и да го спасам од деноноќната тешка работа во кафеаната?

Сигурно знаете и дека некои од нашите членови срдечно помагаат во подучувањето на почетниците. Доаѓаат еднаш или двапати неделно и ги предаваат основите на тие кои само што зачекориле по Патот. И сигурен сум дека честопати добиваат совети од своите најблиски од типот: „каде му помагате и му водите тренинзи, па барем да Ви го плати патот до таму или да Ве ослободи од членарината“. Јас знам дека таквите совети честопати го внесуваат црвот на сомнежот длабоко во душата.
И што мислите Вие, мене ми е тешко да ги ослободам од месечната членарина или да им ги платам патните трошоци на моите помошници?

Има и една група која што несебично ми помага околу изработката на материјалите кои допринесуваат за подобра презентација и популаризација на работата во нашето доџо. Тоа се оние кои ги одржуваат и изработуваат веб-страниците, постерите и флаерите. И тие работат доброволно и редовно си плаќаат месечна членарина за вежбање во доџо-то.
И што мислите Вие, мене ми е тешко да ги ослободам од месечната членарина или да им ги платам нивните услуги?

Моите воини треба да научат да размислуваат ПОИНАКУ.

Јас можам да го ослободам Таки од плаќањето на таксата за учество на кампот. Одамна знаев дека ќе имам доволно учесници кои ќе ги покријат трошоците за организирањето, а останатите пари кои беа предвидени за исплата на татамите во доџо-то (да другари, се уште не се исплатени ниту половината), можам да ги скратам толку – колку да Таки не мора да работи по цел ден во смрдливата кафеана. И што сум постигнал со тоа? Јас ќе Ви кажам. Сум ја уништил можноста Таки да дознае колку тешко се заработуваат парите кои толку многу ни се неопходни. Сум ја уништил можноста да разбере колку му е важно школувањето, бидејќи во спротивно цел живот ќе работи за 200-300 денари дневница. Сум ја уништил можноста да сфати дека животот е тежок и дека мораме сами да се избориме за нашата подобра иднина.

Што е со членовите кои ги подучуваат помладите, но и со оние кои ми помагаат на било каков начин. И нив можам да ги „ослободам“ од плаќањето на месечната членарина. Тоа можеби ќе резултира со неможност на често организирање интернационални семинари, како и со набавка на опрема за тренинг, но и без тоа се може. Но што ќе се постигне со тоа? Јас ќе Ви кажам. Од моите ученици, кои ги учам несебично да помагаат насекаде каде што можат, ќе направам себични индивидуи кои ќе помагаат само тогаш- кога ќе имаат корист од тоа. Наместо несебично да се вложуваат во развојот на доџо-то и да уживаат во можноста да го пренесуваат знаењето и традицијата стекнати токму преку доџо-то, нивните апетити ќе се зголемуваат постојано и со текот на времето ќе почнат будо-то да го гледат како можност за заработување пари и бизнис. А кога тоа ќе се случи, тогаш нивниот Пат во Будо-то станува Пат на алчноста и ќе почнат да го напуштаат вистинскиот Пат. Ќе станат себични и алчни за материјалното и ќе ја уништат сета добрина и сета духовност во себе. Сум имал многу примери досега и верувајте ми дека многу добро го знам тоа.

Ете, само доколку ова го разберете, ќе можете целосно да ја примените поговорката: „Ако сакаш некого да нахраниш – дај му риба. Ако сакаш да му помогнеш за цел живот – научи го сам да си ја лови“.

Размислувајте како воини. Погледнете секогаш најпрвин ОД ДРУГАТА СТРАНА.

Тоа што сите можат да го видам (омоте) ќе Ви помогне само еднаш, а потоа од Вас ќе направи „зависни“ индивидуи кои ќе „помагаат само од корист“. Тоа што можат да го видат воините, а се наоѓа од другата страна (ура), ќе Ви помогне за цел живот и ќе Ве направи вредни и независни личности кои ќе го почитуваат и вреднуваат сечиј труд.

Гамбаре!

Плански, разумно, по можност без грешки. Така некако би требало да делуваат членовите на Пат кон Сонцето. Треба да се види, да се размисли, потоа да се согледа реалноста и можностите и на крајот да се донесе мудра одлука.

Да. Токму затоа заминав во Италија за да можам полесно да донесам одлука. Да согледам и да одлучам после неколку годишно размислување „што понатаму со Оно ха Итто рју“.

Еве ги многу накратко согледувањата и одлуките.

Со ДОЗВОЛА на Сенсеи Черта ја исполнив мојата дамнешна желба. Да вежбам со наследникот на Оно ха Итто рју. Сакав пред се да го запознам Тој човек што секогаш кога ќе погледнам негова фотографија ми оддава впечеток на мир, самоконтрола, дисциплина и хармонија. И сакав да си олеснам во одлуката да се „држам подалеку“ од оваа прекрасна школа за мечување. Се прашувате зошто?

Ние во состав на Даито рју Аикибудо ја изучуваме школата наречена Оно ха Итто рју Кенџутсу (Такеда-ден). И секако, свесни сме дека не сме дел од официјалната линија предводена од Соке Сасамори Такеми  (17-тиот наследник). Никој и никогаш не го тврдел спротивното и отсекогаш Сенсеи Черта негувал огромна почит кон таканаречената мејн-лајн традиција на Оно ха Итто рју. Секако, таа почит ми е пренесена и мене, така што воопшто не станува збор за некаков риваливитет, или, пак, некакво „лажно претставување“. Нам исто така ни е пренесено дека традицијата на Оно ха Итто рју во Такеда-ден е воведена поради подобрување на аики техниките, како и полесно разбирање на принципите на јапонскиот невооружен начин на борба (џуџутсу/таиџутсу). И тука се е јасно.

Сепак, јас со години создавав надеж дека еден ден ќе започнам да ја вежбам „оригиналната“ (ова во наводници, бидејќи не постои друга) Оно ха Итто рју, бидејќи имав навистина голема почит кон оваа боречка школа. И тоа беше така се додека не се сретнав со Теншин Шоден Катори Шинто рју. Вторава, толку многу ја засакав, што љубовта кон неа целосно преовлада. (Проблемот е што моето срце е доволно големо и за двете).

Од друга страна, вежбањето на толку многу боречки школи и секојдневната посета на доџо-то, честите патувања и отсуството од домот, мизерниот начин на живот поради малите финансии и долговите предизвикани од мојата страст кон корју-то, направија да се забрза донесувањето на одлуката дека „време е да се намали темпото“ и да се направи „потесен“ избор. Но ќе бидам многу искрен. Ова не беа главните причини!

Главната причина се наоѓа во фактот што Оно ха Итто рју е толку многу различна од Катори Шинто рју, што почнав помалку да ги мешам (миксирам), а со тоа се појави грижа на совест дека нема да можам да усовршам ниту една како што треба. Се „исплашив“ дека ќе бидам чирак за се, а мајстор за ништо на крајот. (тука да напоменам дека „за чудо“, техниките на Буџинкан воопшто не се „спротиставени“ на техниките и принципите на Даито рју и Катори Шинто рју, туку напротив многу помагаат во изучувањето на двете).

Затоа ми требаше ова „Муша Шугјо“, за да можам да се уверам во сето тоа. И се уверив. „Оригиналната“ Оно ха Итто рју е толку многу различна од Катори Шинто рју, што е невозмжо да ги вежбаш и двете во исто време. Толку различни техники имаат, толку различни филозофии, што постојано се судираат и спротиставуваат една на друга.

И тоа не е се. Разликата почнува од самиот почеток, од начинот на поклонување и поздравување.

Затоа, сакајќи да усовршам целосно една кенџутсу школа, ја одбрав Теншин Шоден Катори Шинто рју. И токму затоа, после семинарот и „официјално“ се откажувам од намерата да ја изучувам Оно ха Итто рју.

Да не се разбереме погрешно. Мојата голема почит кон традицијата на Оно Тадааки останува и понатаму. После средбата со Сасамори Соке, таа е дури и поголема. И кога не би постоела Катори Шинто рју, сигурно би ја одбрал Оно ха Итто рју.

За време на семинарот со Сасамори Соке, се уверив во комплексноста на школата. Од него научив премногу работи кои засекогаш ќе останат врежани во мојата меморија. Од нив ќе имам огромна корист во иднина. Благодарен сум вечно за можноста!

Како знак на мојата почит кон оваа рју-ха, јас сум подготвен да ја дадам целосно мојата подршка на некој од моите ученици доколку посака СЕРИОЗНО да продолжи со изучување на оваа вештина. Тоа подрзбира логистика, простор, контакти итн. Но повторно повторувам – СЕРИОЗНО. Тоа значи подготвеност да се патува, да се жртвува, да се организираат и посетуваат семинари, да се вежба и води група.

А јас? А ние? Остануваме врзани за Оно ха Итто рју (Такеда-ден) како едноставна и скратена верзија, која ни служи да ја подобриме техниката за Аикиџуџутсу. Обврзани сме да го следиме тоа.

А како што веќе кажав, останува почитта и љубовта, а секако и подршката за понатаму…

п.с. За време на семинарот „Кенџутсу под Ѕвездите на Липац“, покрај Такеда-ден, за прв и последен пат ќе предавам и техники и принципи од Оно ха Итто рју Кенџутсу. Сите учесници ќе бидат запознаени со разликите и сличностите меѓу нив. Подгответе ги Вашите прашања.

За да можам да одам на семинарот во Италија со Такеши Сасамори (Соке на Оно ха Итто рју), морав да ја продадам мојата катана за Катори Шинто рју. А за тие пари што ќе ги потрошам таму, ќе можев да одам на одмор каде што сакам и ќе си останев со катаната и без долгови за враќање.

Сепак, катаната не можеше да најде подобар сопственик од шидоши хо Марко.

Да не ја купеше Марко катаната, ќе можеше да оди каде што сака на викенд со својата девојка и сигурно ќе си поминеше фантастично. Но тој направи избор да седи дома и да има одличен меч со кој што ќе може уште повеќе да вежба и да ја усовршува својата вештина во кенџутсу.

Моментов во кој ја донесов одлуката да останам без катана и да одам на семинар во Италија е многу неповолен. Оваа година веќе направив неколку патувања во странство, нормално со цел да ги изучувам класичните боречки вештини, а веќе организирав и два меѓународни семинари кои доста ме чинеа. Но сепак, ниту во еден момент не помислив на можноста дека треба да застанам и да се смирам. Кобудото е дел од мојот живот и едноставно не можам без него.

А секогаш е тоа така. Ако направев ова, ќе беше она. Ако направев она, ќе беше ова. Тоа е релативитет* во животот и секое размислување на таа тема води во бесконечност.

Затоа, денес без размислување купив авио билет за Анкона.

И повторно се препуштам во рацете на судбината. И повторно се откажувам од сите земни задоволства за да можам да ги остварам моите високи цели и идеали поврзани со класичните јапонски боречки вештини. И повторно продолжувам со мојот здодевен живот во кој усовршувањето е најголемото задоволство. Истиот тој здодевен живот кој ми помогна да „прошетам“ низ речиси половина земји во светот трагајќи по најдобрите кобудо учители. Но здодевноста и приоритетите се исто така дел од релативитетот, зарем не?

* Стави ја раката само една минута на загреана рингла и ќе ти си чини дека си ја држел на неа со саати. Разговарај со убава девојка со саати и ќе ти се чини дека тоа траело само една минута. Тоа е релативитет.

„Се повеќе сум убеден дека Катори Шинто рју ќе стане школа во која ќе се заљубат многу луѓе од нашето доџо, а особено ако присуствуваат барем на еден семинар со Сенсеи Ерик. Тоа е доживување кое не е достојно да се опише со зборови.

Морам да започнам со тоа, каков третман имаше Сенсеи Ерик од нашиот Сенсеи и да кажам дека конекцијата УЧИТЕЛ – УЧЕНИК ме импресионираше уште повеќе и верувам дека многу сегашни и поранешни членови можеби никогаш нема да го разберат ова. Случајно или не, знам колку Сенсеи вложува во секој семинар поединечно и знам дека овие настани не му преставуваат обврска или потешкотија, туку чест и задоволство.

Целиот викенд беше прекрасен, почнувајќи од дружењето, тренинзите, вечерите во Визијана, па се до капењето кај Здравкин Камен, новиот дрвен мост на кој ќе лежиме за време на кампот, прекрасната прошетка низ Кратово – град кој до крајот на мојот живот ќе ми остане врежан во срцето и кој никогаш повеќе нема да биде обичен македонски град. Ќе ги запаметам и вежбањето без струја, вежбањето надвор пред доџо-то, прошетките до црквата на ридот,
вицевите на Влатче, насмевката на Таки, „принцот“ Даре, спиењето во Хомбу, ручекот на тетка Ленче, бамбусите високи 2-3 метри, новите hi-tech тоалети, церемонијата за чај и што ли уште не.

Иако сакав да запишувам додека подучува Сенсеи Ерик, не се охрабрив да го прашам Сенсеи дали може да се фаќаат забелешки, па утредента дома запишав тоа што запомнив.
Овој пат со Сенсеи имавме голем „улов“. Да речам „тежок дивеч“. Нови три кати со Бо и сега знаеме вкупно четири. Катите се како од филм. Прекрасни, неверојатни и некако магични. Аптетите пораснаа до врв, а желбата и мотивацијата немаат граница. Со нетрпение го очекувам утрешниот тренинг, на кој ќе нема време за одмор ниту секунда.
Ме радува фактот што се покажува интерес од Буџинкан Македонија и за останатите наши две школи, Даито и Катори. Ме радува фактот што Даре отсекогаш, дури и кога невежбал, давал целосна подршка на клубот и бил лојален, а и понатаму е наш член преку секцијата за Катори. Потоа ќе го споменам Влатче, кој веќе се навикнав да го гледам до мене на сите позначајни настани, семинари и активности. Таки, кој многу млад успеа да види и да извежба (јас на 19 год почнав да вежбам), а истото важи и за Мони. Тука е и Панче, за кој би сакал да продолжи да доаѓа колку што може почесто, со оглед на незгодното работно време.

За Сенсеи Ерик нема што да се зборува. Треба да се види и да се слушне. Романците се покажаа многу коректни и фини, а семпаи-те од Холандија исто така. Знам дека ќе им се доаѓа и понатаму и знам дека секаде ќе зборуваат само најдобро.

Сега не очекува многу работа, а здравје Боже во Турција ќе ги завршиме катите со Бо и тоа со Сенсеи Отаке.

п.с. Тие што планирале да дојдат на овој семинар, а не успеале – верувајте ќе СЕ КАЕТЕ МНОГУ!!!

Уште нешто, Благодарност до Сенсеи за уживањето што ни го долови!