Ве чекам вечер на домашно винце и колачиња. Да ја испратиме старата и да и кажеме добредојде на новата 2010. Во неа ќе бидеме постари за една година. Зошто тогаш славиме секое лето одново? Зашто си ја арчиме живеачката?
Но годините си носат и некои убави работи. Веќе нема никогаш да се врати 2009, но искуството што ќе долета на крилјата на 2010 исто така ќе биде неповторливо.

Прв пат си е прв пат.

Јануари е посебно исполнет со слави и прослави. Се ужива во јадење и пиење. Онака, хедонистички. Некој ќе качи некое килце повеќе, некои ќе ги напумпа мишелинките од страна, некои ќе стави гума за спасување околу струкот. Ќе боли и желудникот, но и главата посабајле. Внимавајте. Секое претерување има последици. Повторувајте по мене: самоконтрола, самоконтрола, самоконтрола…

Мир за Вас, мир за светот.

Дипломата претставува само парче хартија доколку не ја заслужуваш. Но тоа парче хартија носи огромно задоволство кога знаеш дека е освоено со макотрпна работа и кога чуствуваш дека носиш некакво знаење во себе.
Дипломите во Буџинкан Македонија се токму такви. Сведоци на еден период од Вашиот Пат кон Сонцето, од Вашиот пат кон самоусовршувањето и самоконтролата.

Вчера покажавте дека сте одлични ученици. Утре ќе покажете дека сте одлични водачи.

Се гордеам со Вас.

п.с. Како и секогаш, поради транспарентност, Ве информирам дека средтсвата собрани од полагањето ќе бидат наменети за набавка на нови реквизити, како и за доорганизирање на семинарот со Свенерик во април.

Вчера на нашата веб-страница ја објавив Програмата и темата за 2010 година.
Можам да кажам дека за нас, нашата тема е многу поважна од таа на Буџинкан Доџо. Зошто?

Нашата тема е опиплива и реална. Нешто за што сме обучени и спремни. Од друга страна, темата на Буџинкан Доџо е интимна и виртуелна. Таа постои само во светот на соке Хатсуми и се базира на неговите лични чуства и сознанија. А за да можеш да доживееш лични чуства, потребно е многу време да поминеш со некого. Време за кое ќе научиш како тој диши, како мисли и како сонува. Последниве две години соке задава теми кои само тој може да ги разбере. Затоа што се тоа лични чуства кои можеби ние никогаш нема да ги сфатиме. Од друга страна Кото Рју е вистински. Елегантен, но снажен. Толку вистински што и те како се чуствува на кожата, мускулите и коските. Удира до коска.

Сабајлево добив е-маил од Зоки Старото. Вели дека е среќен поради нашата тема. И јас сум среќен мој Зоки. Чудно е колку нинџутсу ме прави среќен, иако татко ми со години на смеа ми вели дека ништо материјално не добивам од тоа. Но затоа добро се познавам себеси. Знам што можам и до каде можам. Духовно сум силен, а телесно цврст. Умот ми е бистар, а сетилата отворени. Духот оштар како меч.
Со почетокот на 2010 ќе почне претставата. Ќе биде смешно кога ќе видам како сите мајсторишта во Буџинкан веднаш ќе почнат да одржуваат семинари за Роккон Шоџо. Пред неколку дена темата е објавена, а веќе сите ја научиле. Така беше и минатата година кога сите предаваа Саино Кон Ки. Како ли научија само после неколку дена. Веднаш влегоа во мозокот на соке и ги извадија информациите од неговиот фајл. Каква вештина.

Поздрав пријатели. Се гледаме вечер на полагање.
Нинпо засекогаш.

Бидејќи денес е работна сабота на ПМФ, ќе ви откријам каде лежат тајните на Нагината Џутсу. Ова е снимка од традиционално доџо за нагината, во кое вежбаат само жени. Читајте го преводот на Баба Сан сенсеи и откријте ги тајните на добриот тренинг.

http://www.youtube.com/watch?v=k9BiuvjUwbI

Се сомневам дека ќе се применува како што треба.
http://www.dnevnik.com.mk/default.asp?ItemID=EA33F19CD8BD3B4CA0E4745EF8B2DA04

Само што дознав дека на Тина Доковска денес и е роденден.
Среќен ти роденден Тина. Да бидеш исполнета со љубов, здравје и среќа и да остариш во нашиот клуб.
Се гордеам со тебе.

И ние имаме многу работа, семејство, девојки, жени, деца, проблеми, но сепак тоа не не спречува да се собираме секој втор ден и да се дружиме, смееме, вежбаме и да ја делиме страста кон боречките вештини.

Вечерва точно во 18:47 часот ќе настапи астрономската зима, денот е познат како зимска краткодневница. Зимата ќе трае до 21 март.

Првиот зимски ден е најкраткиот ден во годината со најдолга ноќ. Сонцето денеска изгреа во 7:00, а ќе зајде во 16:07 часот. Месечината зајде во 9:54, а ќе изгрее во 20:56 часот.

Во чест на денешниот ден, техниките вечерва ќе бидат кратки и брзи.

Година 1988. Нинџа бумот е веќе наголемо присутен во Македонија. Се печати списанието Тајне Нинџи, а филмовите со оваа тематика одат како алва.
Во Аеродром има само една видеотека. Се вика Ем Џи. Еден од членовите се вика Игор Д. и после часовите редовно навратува да провери дали има некој нов нинџа филм на рафтовите. Се носи, специјално за него. А во Хонг Конг се штанцаат еднаш неделно за тие како него. А тие како него знаат дека ваквите филмови се чисто срање. Ефтини хонкошки фикции, толку смешни и јадни, што не вреди ни скршена пара да се даде за нив. Но, тоа е време кога нема многу можности да се види и отпатува на некој семинар. Особено не за 14 годишен тинејџер.
И…се зима од Ем Џи филмче, се собира мало друштво истомисленици и се ужива во ефтината забава. Смеење на кило. Секоја сцена покатасрофална од претходната. Важно е да се види мавтањето со мечот (чајна кунг фу стајл), нинџа оделото (во 1000 бои) и сето тоа што барем малку ќе го израдува срцето што на тие години лудо бие во градите.

А екипата на филмот – стандардна: Јосеп Лау, Ричард Харисон и Џефри Хо. Имаат снимено можеби 500 вакви ефтини филмови.
Најкрвав од сите беше Нинџа Фантазија. Е тука се пролееа многу солзи (од смеење, се разбира).

Овие филмови направија таква штета на Буџинкан, што мојата генерација и ден-денес има лошо мислење на нинџутсу.
Повелете да се насмеете и Вие. Коментирајте за најдобриот момент во филмот

Организацијата Буџинкан Доџо (Bujinkan Dojo) е основана од страна на големиот учител Масааки Хатсуми во чест на неговиот учител Тошитсугу Такаматсу.   Станува збор за интернационална организација со седиште во градот Нода ши, во провинцијата Чиба кен, во Јапонија. Буџинкан Доџо во превод значи „Двор на божествениот воин“ односно „Место каде што вежба божествениот воин“.
Денес, во Буџинкан се изучуваат девет традиционални боречки школи. Шест од нив се стари самурајски, кои, исто така, биле користени и усовршувани од страна на легендарните нинџа воини, додека три се чисто нинџутсу школи. Сите девет стилови биле развивани во текот на неколку столетија од страна на неколку генерации, кои секојдневно морале да се борат за сопствениот, но и за животот на своите најблиски. Пренесувани од колено на колено, од татко на син, од учител на ученик, сите девет школи ги наследил Масааки Хатсуми сенсеи, благодарение на својот учител Такаматсу.

Со основањето на организацијата Буџинкан Доџо, соке (поглавар) Хатсуми ги обединил сите девет школи во една вештина, нарекувајќи ја Буџинкан Рју (школа, традиција) односно Буџинкан Будо Таиџутсу.
Сенсеи Хатсуми е наследник на деветте школи:

– Тогакуре рју Нинџутсу-34 Соке
– Гјокко рју Кошиџутсу-28 Соке
– Кото рју Копоџутсу-18 Соке
– Кукишинден рју Хаппо Бикенџутсу-28 Соке
– Шинденфудо рју Дакентаиџутсу-26 Соке
– Такагијошин рју Џутаиџутсу-17 Соке
– Гикан рју Копоџутсу-15 Соке
– Гјокушин рју Нинџутсу-21 Соке
– Кумогакуре рју Нинџутсу-14 Соке

Иако сите девет школи се изучуваат како една обединета вештина, секоја од нив има своја историја и традиција, свои карактеристики, свои техники и тактики, свои тајни оружја, така што школите односно вештините можат да се изучуваат и одделно.