Корју Буџутсу не е спорт. Да бидеш учител во традиционално доџо е голема одговорност.
Многупати за време на тренингот, кога треба да подучувам некоја ката за која што сум проценил дека е премногу опасна за да се изведе со голема брзина, најавувам дека истата најпрвин ќе ја изведам споро. Откако уке ќе се навикне на движењата и ќе најде начин како да ја избегне повредата, тогаш ритамот на ката-та го забрзувам и обично велам: „еве сега ќе ја направам истата брзо.“
Но постои една група од 3-4 луѓе, „неверни Томо-вци“, кои додека подучувам честопати знаат да направат „фаца“ која вели: „е како да не, ова било брзо, што се замислува овој“. Иако, тие мислат дека јас не ги забележувам, од мој агол „таквите работи“ се гледат кристално јасно.
Дали во таков случај, за да го докажам спротивното, би требало ката-та веднаш и ненајавено да ја направам брзо и ефикасно, за да никој не се посомнева во мене?
Не. Корју буџутсу не е спорт. А да бидеш учител во традиционално доџо е голема одговорност.
Замислете доколку станува збор за ката со оружје, а учителот „падне“ на таква глупава провокација? Замислете тој да не знае како да го совлада своето его и почне да се докажува пред своите ученици? Зарем треба некој да „отиде“ за да водачот на доџо-то ја докаже својата вештина?
Многупати сум се нашол пред различни предизвици, но никогаш не сум дозволил моето его да ме совлада и да почнам да се докажувам. Многу добро знам колку се опасни кобудо техниките. Затоа пред провокациите упатени со „фаца“ и подсмев не одговорам никогаш. Најчесто велам: „не успева секогаш“ и продолжувам понатаму. Но знам дека ако направам за да успее по секоја цена, некој ќе биде повреден. А вештината на учителот не се гледа од неговата способност да ги повредува учениците, туку од начинот на кој тој се движи низ просторот.
На последниот тренинг имаше ситуација кога еден од помладите ученици мислеше дека поради неговата флексибилност ќе може да се ослободи од „Те но учи“. Станува збор за ученик кој има предуслови да стане добар воин во иднина, но се уште неисукусен и незрел. Без да потклекнам на „предизвикот“, но со желба да ја покажам ефикасноста на оружјето и техниката, го врзав малку поквалитетно без при тоа да го стегнувам околу вратот. Но неговата желба за докажување, направи тој самиот да го затегне јаженцето, така што моравме експресно да реагираме за да не се најде во поголема невоља. После оваа случка, истиот ученик го зголеми своето искуство и на своја кожа ја увиде опасноста од техниките.

Корју Буџутсу не е спорт. Да бидеш учител во традиционално доџо е голема одговорност.

_________________________________________________________

Обично во недела избегнувам да пишувам. Но денес е прочка. Затоа на овој ден, ги замолувам сите мои ученици да ми простат за се што сум им згрешил во изминатава година.
Простете ми!

Пред некој тренинг „газам“ планински мајмун на џунан ундо, а до мене „гази“ Марче. Запнувам силно со нозете од паркетот, на фацата одлучност, а дишењето правилно. Стигнуваме до крајот на салата и додека се исправам, Марче ме прашува (по не знам кој пат):
-До кога сенсеи?
-Додека да умрам Марче. Остарев и не ми дојде памет, па не верувам дека допрва ќе ми дојде.
Сум имал многу причини за да се откажам. Но никогаш не сум ниту помислил на такво нешто. Дури и кога сум имал тешки повреди на моето тело.
Кога сме кај повредите, вчера си правев ретроспектива од периодот 1988-2010 (од доле-нагоре):
-десен палец на стопалото (шинат од тсумасаки гери)
-десен зглоб на стопало (дисторзија од салто преку ѕидче)
-операција на десно колено (долготрајни хронични трауми од удари + удар со бокен)
-карлица (долготрајни хронични трауми од падови)
-лево рамо (изместено од пад на Марио Тушек врз него)
-лев лакт (шинат од они кудаки во далечната 1991)

-лева подлактица (напукната од пад од орев по неуспешно префрлување од гранка на гранка)
-лев зглоб на дланка (шинат од омоте гјакутори на Штефен Шулц)
-десен зглоб на дланка (шинат од пад од јаболко при откачување на шуко-то)
-мал прст на десна дланка (шинат и напукнат (пазете ова каков кретенизам) при тренинг атеми но танрен во ѕидот на зградата во задното дворче во 1990)
-неколку убоди со фукија и два убоди со шурикен
-другите повреди се мали и целосно залечени, така што не се бројат.

Па до кога сенсеи?
Додека сум жив !!!!!

п.с. Во последните неколку месеци дојде до огромно покачување на цените на струјата, горивото, храната, а со тоа и до опаѓање на животниот стандард. И покрај сето тоа, ќе се потрудам колку што можам подолго да ја сочувам сегашната цена на членарината за тренинг во доџо-то.

Куден е се што учителот ќе каже, приватно или јавно, директно на тебе или на некој друг. Тоа што учителот го кажал на некој друг, а другиот потоа ти го пренел на тебе – и тоа е куден. Иако се комплетно различни, Куден-от и Котодама-та имаат нешто слично во својата основа. Двете се користат за да разбудат нешто во срцето на ученикот, да му го покажат вистинскиот Пат, вистинскиот начин, да го поврзат со ликот на учителот. Куден-от е комплетен само доколку се предава заедно со Таиден и со Шинден. Само тогаш може да се каже дека трансмисијата е целосна, но не и завршена. Не е завршена затоа што се додека ученикот живее, учителот и неговата трансмисија живеат преку ученикот.

Извор: сенсеи Ишизука—–>Кацем—–>интервју Мијиќ.

Одамна не сме пуштиле некој корју клип на блогот. Одбрав еден добар, бидејќи мајсторот со прецизност карактеристична за кобудо-то објаснува некои елементи. Како што ние разговараме за елементите карактеристични за нашите школи (правци, агли, дијагонали итн.), така и во Јагју Шинкаге рју постојат автономни обележја што ја прават школата специфична.

Мацко и Марче ќе лепат плакати за новото доџо. Антон и Косара веднаш се нудат за помош. Тина се придружува. Лепат сите заедно до 04.15 (изутрина) . Ако лепеа сами, ќе завршеа до 09.15 (наутро).
Другарството е прекрасна работа. Тоа се заслужува со дела. Не со зборови.

Другарството е: Буџинкан Македонија.
п.с. Одвреме-навреме резонирајте со детска логика. Таа секогаш функционира беспрекорно.

Буџинкан Доџо е тежок брод кој продолжува да плови и покрај силниот ветер и дожд.
Буџинкан Македонија е мало бродче. Кога паѓа дожд, морам да исфрлувам вода од него, кога ветерот силно дува, морам да го одржувам во рамнотежа. Дури ни навечер не смеам да заспијам. Тоа е прашање на опстанок. На тоа се привикнував целиот свој живот и таков начин на живот си создадов.
Тоа го направи мојот дух силен и бескомпромисен.

Последниве недели сведоци сме на невидено насилство помеѓу средношколците во нашите училишта. Вестите се преплавени со информации за тепачки со ножеви и метални шипки, а експертите дават празни совети за тоа како за целата оваа ситуација се криви родителите, медиумите, општеството итн.
Сите тие поуки и совети, сите експертизи ни се одамна познати, но никој ништо не презема за да се подобри сигурноста на нашите деца.

Како може филозофијата на кобудо (класичните јапонски борбени вештини) да помогне во ваквата ситуација?

Се сеќавам кога јас бев дете, тепачките во училиштата исто така беа чести. Но тоа што ги разликуваше од денешниве беше таканареченото фер тепање (ферка) каде што силата и вештината се мереше еден на еден, а употребата на било какво оружје беше строго забранета по некое непишано правило (исклучоци имало и секогаш ќе има). Овие борби најчесто завршуваа со пријателство без желба за понатамошна одмазда.
Денес ситуацијата е различна. Нашите деца се се помалку на улица, а се повеќе пред компјутер или пред телевизор. Филмовите кои се емитуваат ги величаат криминалците и најчесто ги претставуваат како симпатични ликови кои животот ги натерал да го прават тоа што го прават. Игриците за компјутер изобилуваат со насилство и крв. Децата се отуѓуваат едни од други, желбата за да се биде подобар од другите ги прави премногу амбициозни, а со тоа емоциите затапуваат и не се бират средства за да се успее или да се биде подобар од другите.

Многу од овие работи можат да се надминат со вежбање на кобудо. Зошто кобудо?
Во класичните боречки вештини не постои натпреварување меѓу вежбачите. Со тоа не се потикнува желбата за успех и не се потхранува амбициозноста која што толку често знае да предизвика емоционални, па дури и ментални проблеми кај луѓето. Во традиционалното доџо (место за вежбање / усовршување) се учи на почит кон постарите, се потикнува пружањето помош на послабите, а со тоа се зголемува хуманоста и љубовта кон сите околу нас.
Во традиционалното доџо болката за време на тренингот е постојано присутна. Така, луѓето кои вежбаат кобудо знаат што значи нанесување болка и какви можат да бидат последиците од нејзиното неконтролирано аплицирање. Како што порано, за време на „ферката“, знаевме зошто не смееме да употребуваме оружје, бидејќи имавме почуствувано што значи болка и без оружје (а камоли со оружје). Со самото тоа, при евентуална борба, Вие внимавате на Вашиот противник бидејќи знаете што можете да му направите доколку не се контролирате.

Од друга страна, децата кои растаат во виртуелниот свет на телевизијата, видео игрите, Фејсбук-от, немаат никогаш почуствувано што значи да удриш, да бидеш удрен односно некој да ти нанесе физичка болка. Поради тоа, кога ќе настапат емоционалните проблеми, посегнуваат по нож или метална шипка и без многу размислување удираат на најранливите места. Главниот лик во филмовите никогаш не покажува болка, како ниту јунаците од видео игрите.

Фрустрацијата се лекува. Но не со совети кои функционираат само на хартија. Нема полесно од тоа да се даде добар совет. Википедија е преполна со добри совети. Праксата е таа што помага. Примената на советите дава резултати.
Сакате да бидете здрави и ментално и физички? Сакате Вашето дете да биде здрава индивидуа спремна да оддолее да искушенијата кои ги носи новото време?

Однесете го во најблиското доџо. Таму ќе почуствува болка и ќе почне да ја почитува. Ќе престане да ја нанесува на другите. Ќе ја остави негативната енергија на паркетот каде што се вежба. Ќе се врати дома свеж и полн со добри мисли.

Шу – потчини се на основата и научи ја до совршенство

Ха – оддели ја реалноста од илузијата

Ри – остави ја техниката, таа е дел од твојата природа

Еден од најважните принципи на секој вистински борец.

„Каџо вараку каџо чикусеи“ односно „Срце како цвеќе и тело како бамбус“.

Ете Ви тема за размислување за денес.

Добрите работи ги прават тие што не се видливи. Вредно работат во позадина без грам желба за себепромоција и слава.